遠望鳳山溪水 – (客語海陸腔)
企在月桃窩頂看下去
一條銀帶彎彎切過新埔街
兩邊白花花个娘菠
伴舞鳳山溪水个喧嘩
正手邊石頭坑地方
伢叔公太參加抗日戰爭
學義和團用眠帳轉掄花
想打擋機關銃仔
頭前枉倒个人儕儕像冬瓜
東洋蕃打贏咧台灣人成為良民
民主國个兵仔變成二十七公
過去个歷史提起斯目汁流
早在兩三百年前
道卡斯族竹塹社老頭家
賣忒老街个開基店面
搬去鹹菜甕个暗潭課館
平埔族差毋多變成客家
該邊流下來的水安逗牛欄河
遷到東北角涼傘頂个廖百拉三斗限
後代帶領佃農抵抗日本領台个部隊
打逡旅順城塞个近衛師團
山砲隆隆騎兵達達來到
蔡家銃櫃个小兵射死軍曹
重傷个赤堠隨戰馬拖轉回頭
沒幾久大軍開來大火燒忒老街
日丸旗插到三山國王个王爺宮
自羊屎窩流下个宵裡溪
佬牛欄河洽水變大河灞
鳳山溪開聲斯大嗷
百年來沒日又沒夜
想起做細人仔時
隨阿姆翻山過六家東海訪親家
該下企在月桃窩頂个涼亭
吃一杯路唇好心人个奉茶
伢姆講不可忘記
平埔佬客家个血脈共下流
轉向來時路遠望新埔个風景
山風吹過幾十年還留在心肝
